10 makinat me emrat më të çuditshëm

Si në periudhë festash, na u duk me vend një artikull pak ndryshe nga të zakonshmit, ndoshta edhe pak gazmor.

Lidhur me emrat e makinave dhe modeleve, ka ndonjë të tillë që nuk ju pëlqen? Apo që ju duket qesharak? Keni menduar ndonjëherë se emri i një makine mund të jetë më i rëndësishëm sesa duket? 

Emrat e modeleve të makinave shpesh janë fryt i kulturës së një vendi, por kur ato transportohen në gjuhë dhe kultura të tjera, atëherë atje e njëjta fjalë mund të jetë pa kuptim për një makinë ose akoma më keq, të tingëllojë qesharake ose me kuptim shumë të keq. Disa shembuj? Lexoni më poshtë!

Volkswagen Jetta është një model që në fillimet e tij në vitet ’80 ndeshi jo pak vështirësi në vendet me gjuhë latine. Jetta – që lexohet “Xhetta” në këto gjuhë mund të tingëllojë e ngjashme me “gettare” që ka kuptimin e të hedhurit diçka tutje, pra mbeturinë. Kjo gjë nuk ka asnjë lidhje me asnjë model Volkswagen, por si fillim emri i modelit nuk ishte me siguri pika e tij e fortë.

Ford Escort është një model i suksesshëm i prodhuesit amerikan, por kjo fjalë shpesh tashmë merr edhe një kuptim tjetër shumë pak të përshtatshëm, atë të shoqërueses me pagesë. Mendoni për një baba familjeje që shkon ngado me Escort 🙂 Shyqyr që Ford nuk e prodhon më!

Emrat e perimeve nuk do të ishin shumë të përshtatshëm për një model makine. Mitsubishi Minica Lettuce nuk është e çuditshme vetëm sepse është me dy dyer në njërin krah dhe vetëm me një derë nga krahu tjetër, por sepse Lettuce do të thotë “sallatë jeshile”. Nga të jenë frymëzuar vallë??

Honda Life Dunk është një Van familjar që ndoshta mund të frymëzojë shumë gjëra, por Dunk??

Kjo fjalë mund të përkthehet në “ngjyerje” të diçkaje, psh një biskotë në qumësht apo një copë bukë në një tas me supë. E pra, “Ngjyerje jete” për një model makine nuk na tingëllon hiç, po hiç fare …

Fiat Ritmo është një tjetër rast interesant për vendet e Amerikës Jugore, ku fjala “Ritmo” ka lidhje me menstruacionet. Sikur të kishin bërë sadopak kërkime në “terren” ndoshta Fiat Ritmo mund të kishte patur një histori më të lavdishme edhe në ato vise 🙂

Pistacchio ka lidhje vetëm me ngjyrën e modelit nga Mitsubishi, sepse askush nuk ka patur kurajon ta provojë nga shija këtë makinë 🙂  … e pra, nuk kemi si ta komentojmë ndryshe një emër që për ne europianët mund të jetë vetëm shije akulloreje.

Daihatsu Naked, dakord që këtij modeli i duken menteshat e dyerve dhe disa detaje të tjera, por nuk jemi fare dakord me emrin “Lakuriq”. Nuk ka pse të ketë lidhje me sinqeritetin emri i makinës me design-in e saj.

Honda Vamos Hobio Travel Dog, një emër kaq i gjatë sikur të ishte ndonjë prejardhje aristokrate me shumë tituj fisnikërie për një model makine? Ok, emri është vetëm “Honda Vamos Hobio” ndërsa “Travel Dog” është emri i një versioni të pasur me aksesorë për kë ka pasion kafshët shtëpiake, por prapë, na duket aq i gjatë saqë mund të lodhemi rrugës e të kemi nevojë për një gotë ujë.

Suzuki Cappuccino???? Pak a shumë si në rastin e Pistacchio-s, … çfarë të themi, ne një kapuçino do ta donim me shkumë ose pa shkumë, por kurrsesi me benzinë ose me naftë. Ok, ok, ky model në fakt nuk është projektuar për eksport jashtë Japonisë, por gjithsesi, mbetet i papërshtatshëm për mendimin tonë.

E ngjashme me Escort, por e një grade më të rëndë, është Mazda Laputa. Nuk ju tingëllon kështu?

Provoni të ndani rrokjen e parë: “la” në spanjisht ka funksionin e nyjes shquese, ndërsa “puta” … ja pra që në Spanjë ky model nuk mendohet të ketë shitur shumë.